د پيرياني کس عوامل ، علائم او علاج

د مس شيطان (پيريانې ) نښې او علاج

اسلام علیکم ورحمته الله وبرکاته.

کوم ښځه چې پيرياني وي ، پيريان لري د هغه سره څه کول پکار دي ؟

بختيار – ايران


ځواب

بسم الله الرحمن الرحيم

اول د پيرياني کېدو عوامل :

دا چې په انسان باندې پيريان او يا شيطانان مسلط ګرځي لاندې عوامل لري .

الف ) : پيريانو ته ضرر رسول او د هغوی انتقام .

– په آشپزخانه او حمام کې د بسم الله ويلو پرته ګرمي او جوش اوبه اچول .

– تشناب ته د ننوتلو په وخت کې مسنونه دعا نه ويل او پر پيريانو باندې ميتيازې کول .

– د حشراتو په ځالو يا سوريو ، سوړو کې بولې او ميتيازې کول .

– په کور کې د ضرر او زيان پرته د حشراتو وژل .

– د ضرر رسولو پرته سپي او پشکې ته ضرر او زيان رسول .

– په کور کې د الله د ذکر او د قرآن د تلاوت ترک او د هغه پر ځای موسیقي .

– په شپه کې د بسم الله ويلو پرته د ډبرې او يا بل څه غوځول .

– سحر او جادو

پيريان او شيطانان د بسم الله او اذکارو په ويلو سره تښتي او په انسان حمله نشي کولای ، چې په دې بنا مسنونه اذکار خاص اهميت لري لکه : د خوراک د پيل دعا ، حمام ته د ننوتلو او وتلو دعا ، کور ته د ننوتلو او وتلو دعا ، د خوب دعا او نور ، تفصیل دلته ولولئ .

https://dawat610.com/archives/3978

مګر هغه کس چې په مسنونه اذکارو عمل کوي شيطان او پيريان هغه ته ضرر نشي رسولای د انتقام لپاره د هغه نږدې کس او نږدې خپلوان ته ضرر رسوي .

ب ) : د عبادت ترک کول او يا هغه په ښه شان سره نه اداکول ، مثلاً لمونځ صحي نه ادا کول او داسې نور ، په ډيرو ګناهونو باندې مبتلاء کيدل او د توبې او استغفار ترک کول ددې سبب کيږي چې په انسان باندې پيريان او شيطانان تسلط مومي .

د پيرياني کس (مس شيطان ) ځينې علائم :

– ډير زيات په غصه او قهر کېدل .

– زيات پتنګ کيدل .

– د خپل کور ، کار ، ښځې ، يا خاوند ، خپلوانو او او ټولنې څخه نفرت کول .

– د زړه کلک والی او بې رحمي .

– غير ارادې حرکات او د کوم طبي سبب پرته د ځينو اندامونو کږوالی .

– د عجيبو آوازونو اورېدل .

– د کوم سبب پرته د بدن حرارت ، تبه او خولې کېدل .

– بې سببه ژړل .

– کډوډې خبرې .

– په خوب کې د حيوانانو لکه : ليوه ، مار ، لړم او نورو حيواناتو ليدل ، قبرستان ، همدارنګه په خوب کې په ناپاکو اوبو او چټلې او وينو ککړېدل او نور ګډوډ او نا آرامه خوبونه د مس شيطان نښه ده .

– کسل او ټبلي او ډير وسواس .

وقايه :

۱- په لمانځه او ټولو شرعي امورو مواظبت .

۲- ذکر ، تلاوت او منسونه دعاګانې ، خصوصاً د بيت خلا، ، خوراک ، خوب او نور منسونه اذکار او دعاګانې ، د سهار او ماښام اذکار ، آيت کرسي ويل او د خوب پر مهال د مغوذتين تلاوت کول او شپې د البقرې دوه آخري آيتونه لوستل .

۳- د ضرر رسولو پرته د حشراتو له وژلو څخه ځان ساتل .

۴- د ماښام وروسته د بهر وتلو څخه د ماشومانو منع کول .

۵- خپل کور له مجسمو ، تصويرونو ، ساز او سرود او موسيقی څخه پاکول .

د مس شيطان (پيرياني ) او سحر شرعي علاج :

په مريض باندې د سورت فاتحې ، قل الله ، معوذتين لوستل او د اعراف (۱۱۷۰۱۱۹) آيتونه ، سوره يونس (۷۹-۸۲ ) آيتونه ، سوره طه (۶۵-۶۹ ) ايتونه لوستل او په مريض دم کول او يا د اوبو دمول او هغه مريض ته ور څښل .

د دم کوونکې لپاره اخلاص ، پر الله تعالی توکل ، صحي عقيده ، په شرعي طريقه دم کول شرط دي .

و ما توفيقي الا بالله عليه توکلت و اليه انيب

آن لاين اسلامي لارښود

Print Friendly, PDF & Email

اترك تعليقاً